A po shkel ATK parimin e proporcionalitetit kur vendos një barrë tatimore shumëfish më të lartë se borxhi?

Tatimpaguesit në Kosovë po përballen me një problem serioz: vendosja disproporcionale e barrës tatimore nga Administrata Tatimore e Kosovës (ATK). Në shumë raste, për një borxh tatimor prej 100,000 eurosh, ATK mund të vendosë barrë mbi një pasuri që vlen shumë herë më tepër, për shembull 5 milionë euro. Kjo është një masë që nuk respekton parimin e proporcionalitetit dhe cenon të drejtat themelore të tatimpaguesve. Në shumicën e rasteve, dëmi ekonomik që rrjedh nga kjo masë është tepër i lartë dhe, në raste të caktuara, mund të çojë edhe në falimentim.

Parimi i proporcionalitetit, i cili është një element kyç i së drejtës administrative, është i përfshirë në Ligjin nr. 05/L-031 për Procedurën e Përgjithshme Administrative, neni 5. Ky parim kërkon që çdo masë administrative të jetë proporcionale me qëllimin e saj – pra, masa duhet të jetë e përshtatshme, e nevojshme dhe e balancuar.

Më tej, Kushtetuta e Republikës së Kosovës, në nenin 31, siguron të drejtën për një gjykim të drejtë, dhe parimet e proporcionalitetit janë të ngulitura në të për të mbrojtur individët nga veprimet e tepruara administrative.
Gjithashtu, në nenin 55 të Kushtetutës parashikohet që kufizimet e të drejtave dhe lirive të bëhen vetëm në përputhje me ligjin dhe duke respektuar parimin e proporcionalitetit. Kur një pasuri e madhe bllokohet për një borxh të vogël, ky parim shkelet, dhe tatimpaguesit përballen me rreziqe të mëdha financiare.

Profesionistët e fushës tatimore duhet të punojnë së bashku për të siguruar që masat e ndërmarra nga ATK të jenë të drejta, ligjore dhe proporcionale me borxhin tatimor. Respektimi i parimeve kushtetuese është thelbësor për një sistem tatimor të drejtë.

Kjo nuk është shkelja e vetme që ndër vite e bën ATK.

A keni përjetuar ju apo klienti juaj ndonjëherë masa të tilla disproporcionale? Na kontaktoni për të diskutuar se si mund ta ndalim këtë praktikë të dëmshme.